မျှော်လင့်ချက်ကိုယ်စီနဲ့ ထိပ်တိုက်တွေ့တဲ့ မန်ယူနဲ့ အာဆင်နယ်

ပရီးမီးယားလိဂ် သမိုင်းတစ်လျှောက်မှာ မန်ချက်စတာယူနိုက်တက်နဲ့ အာဆင်နယ်တို့ဟာ ဂန္ထဝင် ပြိုင်ဘက်တွေလို့ ညွှန်းရလောက်အောင် ဒီနှစ်သင်းတွေ့ဆုံမှုဟာ အမြဲတမ်း စိတ်လှုပ်ရှားစရာတွေ ပြည့်နှက်နေလေ့ရှိပါတယ်။ တစ်သင်းသင်းက နိမ့်ပါးနေတဲ့ အနေအထားမျိုး ကြုံနေချိန်မှာတော့ ဒီနှစ်သင်း ရင်ဆိုင်ဖြစ်ပြီဆိုတာနဲ့ အစွမ်းရှိသမျှ ညှစ်ကစားကြလို့ အမြဲတမ်းလိုလို ပွဲကောင်းတွေ ဖြစ်နေတတ်တယ်။ ဖေဖော်ဝါရီ ၂၈ ရက် အိုးလ်ထရက်ဖို့ဒ်မှာ တွေ့ဆုံမယ့် ပွဲစဉ်ကတော့ အာဆင်နယ်ရဲ့ ချန်ပီယံ မျှော်လင့်ချက်နဲ့ ယူနိုက်တက်ရဲ့ ချန်ပီယံလိဂ်မျှော်လင့်ချက် ငွေ့ငွေ့တို့ အသက်ဆက်နိုင်မလားဆိုတာကို အဖြေထုတ်ပေးမယ့် အနေအထားပါ။ ပိုပြီး စိတ်ဝင်စားစရာကောင်းတာက နှစ်သင်းစလုံးအတွက် အနိုင်သုံးမှတ်ဟာ သေရေးရှင်ရေး အနေအထားလောက်ကို လိုအပ်နေတာဖြစ်ပါတယ်။

ပဲ့ကိုင်ရှင်များ

ယူနိုက်တက် မန်နေဂျာ လူးဝစ်ဗန်ဂါးလ်ကတော့ ဒီရာသီ ရုန်းကန်ရမှုတွေကြောင့် ထုတ်ပယ် ခံရတော့မယ်လို့ အကြိမ်ကြိမ် သတင်းကြီးရင်း နေရာမြဲနေသူ ဖြစ်ပါတယ်။ ဘောလုံးပိုင်ဆိုင်မှု စိုးမိုးအသာစီးရရေးဆိုတဲ့ သူ့ရဲ့ နည်းဗျူဟာ ဒဿနဟာ ကစားသမား အမြောက်အမြား ဒဏ်ရာရနေတဲ့ လက်ရှိ အသင်းမှာ လက်တွေ့ ဖော်ဆောင်ဖို့ အကန့်အသတ်တွေ အများကြီးရှိနေပါတယ်။ ဒါပေမဲ့ ဒီဒတ်ခ်ျနည်းပြကြီးက ကြံ့ခိုင်မှု ပြည့်ဝနေတဲ့ ကစားသမားတွေနဲ့ ပိုပြီး လိုက်လျောညီထွေ ရှိနိုင်မယ့် အခင်းအကျင်းမျိုးကို ပြောင်းလဲဖို့ လုံးဝစိတ်မဝင်စားပါဘူး။ သူ့ရဲ့ စိတ်တိုင်းကျ ကစားကွက်ထဲ အတင်းသွတ်သွင်းနေခြင်းဟာ လက်ရှိ ယူနိုက်တက်မှာ ကြုံနေရတဲ့ ပြဿနာတွေရဲ့ အခြေခံအကြောင်းတရားတစ်ခု ဖြစ်နိုင်ပါတယ်။
အာဆင်နယ် မန်နေဂျာ အာစင်ဝင်းဂါးကတော့ ၂၀၀၄ နောက်ပိုင်း ပထမဆုံးအမှတ်ပေး ချန်ပီယံဆုကို ဒီရာသီမှာ အရယူဖို့ အားသွန်ကြိုးစားနေပါတယ်။ အထူးသဖြင့် အဓိကပြိုင်ဘက်တွေဖြစ်တဲ့ ယူနိုက်တက်၊ ချယ်လ်ဆီးနဲ့ မန်ချက်စတာစီးတီးတို့ ယိမ်းယိုင်နေချိန်မှာ အာဆင်နယ်က ချန်ပီယံဆုအတွက် အလားအလာကောင်းလာတယ်။ ဒါပေမဲ့ လက်စတာစီးတီးနဲ့ တော့တင်ဟမ်ဟော့စပါးတို့ရဲ့ ဒီရာသီခြေစွမ်းကလည်း အပျံစားဖြစ်နေလေတော့ ဝင်းဂါးအတွက် ပွဲတိုင်းပွဲတိုင်းမှာ အမှတ်တွေ ရသလောက် စုဆောင်းဖို့ အင်မတန်အရေးကြီးနေပါတယ်။ လွန်ခဲ့တဲ့ ၁၃ နှစ်အတွင်း အိုးလ်ထရက်ဖို့ဒ်မှာ တစ်ကြိမ်သာ နိုင်ဖူးတယ်ဆိုတဲ့ အစဉ်အလာဆိုးကို ဝင်းဂါးတစ်ယောက်တော်လှန်နိုင်မလားဆိုတာကို စောင့်ကြည့်ရမှာ ဖြစ်ပါတယ်။

လက်ရှိခြေစွမ်း

တစ်ရာသီလုံးစာ ဖြတ်သန်းမှုမှာ အာဆင်နယ်က သိသိသာသာပိုတည်ငြိမ်သလို ပထမအကျော့ အမ်းမရိတ်စ်မှာလည်း ယူနိုက်တက်ကို ၃-၀ ဂိုးနဲ့ အပြတ်အသတ်အနိုင်ယူထားတယ်။ ပြီးတော့ လက်ရှိအချိန်မှာလည်း အဓိကကစားသမား အများစုဒဏ်ရာ ကင်းစင်နေပါတယ်။ ဒါပေမဲ့ ကြားရက် ချန်ပီယံလိဂ်ပွဲစဉ်မှာ ဘာစီလိုနာကို အိမ်ကွင်းမှာတင် ၂-၀ ဂိုးနဲ့ အရေးနိမ့်ထားခြင်းကတော့ ဝင်းဂါးရဲ့ တပ်သားတွေအပေါ် စိတ်ဓာတ်ရေးရာ ထိုးနှက်ချက်လေး နည်းနည်းရှိနေနိုင်တယ်။ အာဆင်နယ်မှာ ဒီရာသီ အတောက်ပဆုံး ကစားသမားဖြစ်တဲ့ မီဆွတ်အိုဇေးလ်က ပရီးမီးယားလိဂ်မှာ ဂိုးဖန်တီးမှု (၁၇) ကြိမ် ပြုလုပ်ပြထားပြီး သီအာရီအွန်နရီရဲ့ တစ်ရာသီအတွင်း ပရီးမီးယားလိဂ်ဂိုးဖန်တီးမှု အများဆုံးအကြိမ် (၂၀)ဆိုတဲ့ စံချိန်ကို ချိုးဖျက်ဖို့ တာဆူနေပါတယ်။

ယူနိုက်တက်ကတော့ အဓိက ကစားသမား ၁၀ ယောက်ထက်မနည်းနာနေတဲ့ ဒုက္ခကြောင့် လူစာရင်းက တစ်ပွဲကို တစ်မျိုးလောက် ပြောင်းနေတယ်။ ဒီအချက်က ဗန်ဂါးလ်ခက်ခက်ခဲခဲ ရုန်းကန်နေရတဲ့ အခြေအနေတွေအတွက် အဓိကကျတဲ့ အကြောင်းရင်း တစ်ခုဆိုရင်လည်း မမှားဘူး။ ဆန်းဒါးလန်းနဲ့ မစ်ဂျီလန်းတို့ကို နှစ်ပွဲဆက်အရေးနိမ့်ပြီးနောက် အကြီးအကျယ် အကျပ်ရိုက်လာချိန်မှာ ဗန်ဂါးလ်ရဲ့ အသင်းက ရှရူးဘယ်ရီနဲ့ မစ်ဂျီလန်း (ဒုတိယအကျော့)တို့ကို ဂိုးပြတ်တွေ နိုင်လိုက်လို့ အသက်ရှူချောင်သွားပါတယ်။ အဲဒီနှစ်ပွဲမှာ ယူနိုက်တက်ဟာ ရှစ် ဂိုးသွင်းပြီး တစ်ဂိုးသာ ခွင့်ပြုခဲ့ရတယ်။ ဒါ့အပြင် မစ်ဂျီလန်းနဲ့ ဒုတိယအကျော့မှာ အကယ်ဒမီထွက် လူငယ်တွေကိုပါ ထုတ်သုံးပြီး Pressing Gameကို အကောင်းဆုံး ကစားပြသွားခြင်းကြောင့် အသင်းရဲ့ စိတ်ဓာတ်က အတက်ဘက်ကို ဦးတည်နေပါလိမ့်မယ်။ ဒါပေမဲ့ ရှရူးဘယ်ရီနဲ့ မစ်ဂျီလန်းတို့ဆိုတာ အာဆင်နယ်နဲ့ အဆင့်ချင်း တခြားစီဆိုတာကိုတော့ သတိပြုရမှာ ဖြစ်ပါတယ်။

ဖြစ်နိုင်ခြေ အခင်းအကျင်း

အာဆင်နယ်ကတော့ အဝေးကွင်းမှာ လူစုံတက်စုံ ပွဲထွက်လာနိုင်ပါတယ်။ ကွင်းလယ်မှာ ဂျက်ဝီလ်ရှိုင်းယား၊ အဲလက်စ်အော့စ်လိဒ်ချိန်ဘာလိန်နဲ့ ဆန်တီကာဇိုလာတို့ မကစားနိုင်ပေမယ့် အာရွန်ရမ်ဆေး၊ ဖရန်ဆစ်ကိုကွီလင်၊ မက်သရူးဖလာမီနီတို့အပြင် တစ်ရာသီလုံးခြေစွမ်းပြနေတဲ့ အိုဇေးလ်လည်း ကြံ့ခိုင်မှုပြည့်ဝနေတယ်။ နောက်တန်းမှာလည်း အရန်လူ ဂါဘရီရယ်လ်ပေါ်လစ္စတာ တစ်ယောက်လောက်ပဲ နာနေတာပါ။ အာဆင်နယ်ရဲ့ အားသာမှုကတော့ တိုက်စစ်ပိုင်းအတွက် ရွေးချယ်စရာ ပေါများနေခြင်းပါပဲ။ မစ်ဂျီလန်းနဲ့ပွဲမှာ ယူနိုက်တက်ဟာ ခံစစ်ပိုင်း ပြဿနာကြောင့် ကွင်းလယ်လူ နှစ်ယောက်ဖြစ်တဲ့ ဒါလင်ဘလိုင်းနဲ့ မိုက်ကယ်ကာရစ်တို့ ခံစစ်မှာ တွဲကစားသွားရတယ်။ အိုလီဗီရာဂျီရော့ဒ်လို တိုးအားကောင်းတဲ့ တိုက်စစ်မှူးမျိုးကို ဒီခံစစ်အတွဲအဖက်မျိုးနဲ့ ထိန်းချုပ်ဖို့ ခက်ပါလိမ့်မယ်။ ပထမအကျော့က ယူနိုက်တက်ကို ဂိုးတွေ သွင်းခဲ့တဲ့ အလက်ဆစ်ဆန်းချက်ဇ်ကလည်း လန်းလန်းဆန်းဆန်းရှိနေတယ်။

ယူနိုက်တက် လူစာရင်းကတော့ ဆေးရုံက လူနာစာရင်းနဲ့ မှားနေသလား ထင်ရလောက်အောင် အခြေအနေဆိုးပါတယ်။ အဓိက ဂိုးသမား ဒေးဗစ်ဒီဂီယာ၊ ဒီရာသီ ခြေစွမ်းပြနေတဲ့ လူငယ်တိုက်စစ်သမား အန်ထော်နီ မာရှယ်၊ အသင်းခေါင်းဆောင် ဝိန်းရွန်းနေ၊ ဝါရင့်ကွင်းလယ်ကစားသမား ဘက်စတီယန် ရှဝိုင်းစတိုင်ဂါတို့အပြင် ဒီရာသီ ဗန်ဂါးလ်ရဲ့ ဗျူဟာမှာ အရေးပါခဲ့တဲ့  မော်ရိုဖယ်လိုင်နီ၊ နောက်ထပ်ခံစစ်သမား ခြောက်ယောက်တို့ ဒဏ်ရာတွေရနေတယ်။ ယူနိုက်တက် လူစာရင်းမှာ ကွင်းလယ်ကို အထိုင်မပျက်အောင် စုဖွဲ့လို့ရပေမယ့် ခံစစ်နဲ့ တိုက်စစ်မှာတော့ ရွေးစရာ မရှိသလောက်ပဲ။ ဒါကြောင့် ဗန်ဂါးလ် အနေနဲ့ မစ်ဂျီလန်းနဲ့ပွဲမှာ နှစ်ဂိုးသွင်းခဲ့တဲ့ အကယ်ဒမီထွက် အသက် (၁၈)နှစ်သား တိုက်စစ်မှူးလေးမားကက်စ်ရက်ရ်ှဖို့ဒ်ကို ထုတ်သုံးလာမလားဆိုတာကို စောင့်ကြည့်ရပါမယ်။ ခံစစ်မှာ မားကို့စ်ရိုဂျိုပြန်ပါလာနိုင်ပေမယ့် ခရစ်စမောလင်း၊မက်တီယို ဒါမီယန်၊ လုခ်ရှော၊ အန်တိုနီယိုဗလန်စီယာ၊ ဖီးလ်ဂျုံးစ်၊ ကင်မရွန် ဘော့သ်ဝစ်ခ်ဂျက်ဆန်တို့အားလုံး ဒဏ်ရာတွေနဲ့ အနားယူနေရပါတယ်။ ဒါ့အပြင် ဒီဂီယာပါမကစားနိုင်ဘူးဆိုရင်တော့ ဗန်ဂါးလ်ရဲ့ အသင်းဟာ ခံစစ်ပိုင်းအတွက် တော်တော်လေးမျက်ခုံးလှုပ်ရမယ့် အနေအထားပါပဲ။

စောင့်ကြည့်ရမယ့် ကစားသမား

ရွေးချယ်စရာ သိပ်မရှိတဲ့ အခြေအနေမှာ ယူနိုက်တက်အတွက်တော့ မမ်းဖစ်ဒီပိုင်းကိုပဲ စောင့်ကြည့်ရပါလိမ့်မယ်။ ဒီနယ်သာလန်သားဟာ အင်္ဂလန်ကို ပြောင်းလာပြီး ကတည်းက အသင်းနဲ့ လမိုင်းမကပ်လှဘဲ တောက်လျှောက် ရုန်းကန်နေခဲ့ရပါတယ်။ ပရိသတ်က အများကြီး မျှော်လင့်ထားပေမယ့် နယ်သာလန် လက်ရွေးစင် တောင်ပံတိုက်စစ်သမားရဲ့ အလွဲလွဲ အချော်ချော်ဖြစ်ရပ်တွေကြောင့် အသင်းအတွက် နစ်နာမှုတွေ တော်တော်များများ ကြုံခဲ့တဲ့နောက် ဒီပိုင်းတစ်ယောက် အရန်ခုံတောင် ရောက်သွားခဲ့ပါတယ်။ ဒါပေမဲ့ မစ်ဂျီလန်းနဲ့ ပွဲမှာတော့ တစ်ချိန်က ပီအက်စ်ဗီအင်ဒိုဗန်မှာ တောက်ပခဲ့ဖူးတဲ့ စွဲမက်တိမ်းမူးစရာ ခြေစွမ်းမျိုး တစ်ကျော့ပြန်ပြသခဲ့သလို အားပါပြင်းထန်တဲ့ အဝေးကန်ချက်နဲ့ ဂိုးပါ သွင်းယူသွားခဲ့တယ်။ ပြိုင်ဘက်ဟာ အသင်းငယ်လေးတစ်သင်းသာ ဖြစ်ပေမယ့် အဲဒီပွဲကစားပုံကြောင့် ဒီပိုင်းရဲ့ ယုံကြည်မှုပိုင်း ပြန်တက်လာမှာ သေချာပါတယ်။ ဒါကြောင့် အာဆင်နယ်နဲ့ ပွဲစဉ်အထိ သူ့ရဲ့ ခြေစွမ်းကောင်းတွေကို သယ်ဆောင်လာနိုင်ဦးမလားဆိုတာက စိတ်ဝင်စားစရာ မေးခွန်းတစ်ခုပါပဲ။

အာဆင်နယ်မှာတော့ အိုဇေးလ်ဟာ မှော်ဝင်ခြေစွမ်းနဲ့ ဖန်တီးမှု အခင်းအကျင်းကောင်းတွေကို လုပ်ပြဦးမှာပါ။ ဒါပေမဲ့ ဒီပွဲမှာ စောင့်ကြည့်သင့်တာက ဒန်နီဝဲလ်ဘတ်ဖြစ်ပါတယ်။ ဗန်ဂါးလ်ရဲ့ မလိုလားမှုကြောင့် အာဆင်နယ်ကို ရောင်းထုတ်ခံခဲ့ရတဲ့ အင်္ဂလန် တိုက်စစ်မှူးဟာ ပြီးခဲ့တဲ့ ၁၀ ပတ် လောက်မှာ ဒူးဒဏ်ရာကြောင့် အနားယူနေခဲ့ရပေမယ့် ပထမဆုံး ပြန်ကစားတဲ့ပွဲမှာ ဇယားထိပ်က လက်စတာဘက် အနိုင်ဂိုးသွင်းယူပြီး အသင်းရဲ့ တစ်ကျော့ပြန် သူရဲကောင်း ဖြစ်လာခဲ့ပါတယ်။ အခုပွဲမှာလည်း သူ့အပေါ် အယုံအကြည် မဲ့ခဲ့တဲ့ ဗန်ဂါးလ်ကို လက်စားချေဖို့ ဝဲလ်ဘတ်တစ်ယောက် ဆန္ဒပြင်းပြနေမှာပါ။ ဝင်းဂါးအနေနဲ့ တိုက်စစ်မှာ ဂျီရော့ဒ်ကို ထုတ်သုံးပြီး ဝဲလ်ဘတ်ကို ဘယ်ခြမ်းကနေ ထိုးဖောက်ခိုင်းတာမျိုး တာဝန်ပေးလာနိုင်ခြေရှိနေတယ်။ ဒါဆိုရင်တော့ လောလောဆယ် ဂွီလာမို ဗာရဲလားနဲ့ ဒေါ်နယ်လ်လက်ဗ်တို့လို လူငယ်တွေကို မဖြစ်မနေထုတ်သုံးပြီး ကျားကန်ထားရတဲ့ ယူနိုက်တက် ညာခြမ်းခံစစ်အတွက် တော်တော်လေး ဝန်ပိလာမှာ သေချာပါတယ်။

-----------------------------------

ခြုံငုံသုံးသပ်ချက်

-----------------------------------

နှစ်သင်းယှဉ်ကြည့်ရင် ယူနိုက်တက်က အိမ်ကွင်းအားသာချက်နဲ့ စိတ်ဓာတ်ပိုင်း အသာစီး အနေအထားတွေ ရှိနေတယ်။ ဒါပေမဲ့ အာဆင်နယ်လို အစဉ်အလာပြိုင်ဘက်နဲ့ ရင်ဆိုင်ရတဲ့ ပွဲစဉ်မျိုးမှာ ယူနိုက်တက် အကယ်ဒမီထွက် လူငယ်လေးတွေ ဖိအားဒဏ်ခံနိုင်မလား ဆိုတာက စိတ်ပူစရာပါ။ အာဆင်နယ်ကတော့ ပိုကောင်းတဲ့ လူအင်အားနဲ့ စုဖွဲ့မှု ပိုင်ဆိုင်ထားပြီး တစ်ရာသီလုံး ဖြတ်သန်းမှုမှာလည်း ပိုတည်ငြိမ်နေတယ်။ ဒီပွဲမျိုး သရေကျသင့်တယ်လို့ ခံစားမိပေမယ့် နှစ်သင်းစလုံး အနိုင်ရလဒ်ကို ဦးတည်ကစားမယ့် အခြေအနေကိုတော့ မျက်ကွယ်ပြုလို့ မရပါဘူး။ အာဆင်နယ်က ချန်ပီယံလိဂ်မှာ အလားအလာမကောင်းတော့တာကြောင့် ပရီးမီးယားလိဂ်ကို ပိုအာရုံစိုက်လာမယ့် အချက်ကိုပါ ထည့်တွက်ရင် အိုးလ်ထရက်ဖို့ဒ်မှာ ဧည့်သည်တွေရဲ့ အလားအလာက ယောင်ယောင်လေး ပိုကောင်းနေတယ်လို့ပဲ ကောက်ချက်ချရပါလိမ့်မယ်။

Credit – 7Daydaily

အောင်မြင့်မြတ်(Myanmar Youths)