ချန်ပီယံလိဂ် ဝင်ခွင့်အတွက် မျှော်လင့်ချက် ကြီးကြီးမားမား ရှင်သန်လာပြီဟု ဗန်ဂါးလ်ကြွေးကြော်

လာမည့်ရာသီ ချန်ပီယံလိဂ် ဝင်ခွင့်နေရာအတွက် မျှော်လင့်ချက် ကြီးကြီးမားမား ရှင်သန်လာပြီဟု မန်ချက်စတာ ယူနိုက်တက် မန်နေဂျာ လူးဝစ်ဗန်ဂါးလ်က ကြွေးကြော်ခဲ့သည်။

ယူနိုက်တက်သည် အစ်တီဟတ်တွင် မန်ချက်စတာစီးတီးကို မားကက်စ် ရက်ရ်ှဖို့ဒ်၏ တစ်လုံးတည်းသော သွင်းဂိုးဖြင့် အနိုင်ယူပြီးနောက် အမှတ်ပေးဇယား အဆင့်(၄) နေရာနှင့် တစ်မှတ်အကွာသို့ ရောက်ရှိလာသည်။ လက်ရှိတွင်မူ အဆင့်(၆)၌ ရှိနေသည့်တိုင် အဆင့်(၄)မှ မန်စီးတီးကို ကျော်တက်ပြီး ချန်ပီယံလိဂ် ဝင်ခွင့်ကို လက်ဆုပ်လက်ကိုင် ရယူနိုင်မည်ဟု နယ်သာလန်သား မန်နေဂျာကြီးက တက်တက်ကြွကြွ ယုံကြည်လျက် ရှိသည်။ “ကျွန်တော်တို့ ရှုံးခဲ့မယ် ဆိုရင်တော့ ကွာဟချက် သိပ်ကြီးသွားလိမ့်မယ်။ သရေကျခဲ့ရင်လည်း တူတူပဲ။ အရမ်းခက်သွားလိမ့်မယ်လေ”ဟု ဗန်ဂါးလ်က ဆိုသည်။

၎င်းက “အခုတော့ အခြေအနေတိုင်းက ကျွန်တော်တို့ လက်ထဲမှာ ဆက်ရှိနေတယ်။ ဒါပေမဲ့ ကျွန်တော်တို့ နိုင်ပွဲတွေ ရယူဖို့ လိုပါတယ်။ လက်ကျန်ပွဲတွေမှာ အိမ်ကွင်းပွဲက ပိုများတယ်။ ပြီးတော့ အိုးလ်ထရက်ဖို့ဒ်မှာ ကျွန်တော်တို့က သိပ်မရှုံးဘူး။ ဒီတော့ ကျွန်တော်တို့မှာ အခွင့်အလမ်း ကြီးကြီးမားမား ရှိနေတုန်းပဲလို့ ပြောနိုင်တယ်”ဟုလည်း မှတ်ချက်ပြုခဲ့သည်။ ယူနိုက်တက်သည် (၂၀၁၂)ခုနှစ်၊ ဒီဇင်ဘာလနောက်ပိုင်း ပထမဆုံးအကြိမ် အစ်တီဟတ်တွင် အနိုင်ရခဲ့ခြင်း ဖြစ်သည်။ လီဗာပူးလ်ကို နှစ်ကျော့ပေါင်း ရလဒ်ဖြင့် အရေးနိမ့်ကာ ယူရိုပါလိဂ်မှ ထွက်ခွာရပြီး (၃)ရက်အကြာတွင် ယူနိုက်တက်က မန်ချက်စတာ ဒါဘီ၌ အောင်ပွဲခံခဲ့ခြင်း ဖြစ်သည်။

“ပထမပိုင်းမှာ ကျွန်တော်တို့ ကစားပုံ သိပ်ကောင်းခဲ့တယ်။ ဒုတိယပိုင်းမှာတော့ အတော်လေး ရုန်းကန်ခဲ့ရပါတယ်။ ဒါကလည်း ကျွန်တော်တို့ အရမ်း ပွဲပန်းထားတာကြောင့်ပါ။ လီဗာပူးလ်နဲ့ ပွဲအပြီး တစ်ရက်၊ နှစ်ရက်လောက်ပဲ အနားရခဲ့တာ။ ဒီလို ပွဲကျပ်မျိုးကို တစ်ချိန်လုံး အင်အားအပြည့် ကစားဖို့ မဖြစ်နိုင်ပါဘူး။ ဆောက်သမ်တန်နဲ့ လီဗာပူးလ် ပွဲရလဒ်ကိုပဲ ကြည့်ပါ။ လီဗာပူးလ်က နှစ်ဂိုးအသာ ရထားပြီးမှ အဆုံးမှာ (၃-၂)နဲ့ ရှုံးသွားတယ်။ အဲဒီပွဲကို ကျွန်တော် မကြည့်လိုက်ရပါဘူး။ ဒါပေမဲ့ ကျွန်တော် ကောက်ချက်ချနိုင်တာက အခုလို ဖြစ်သွားရာမှာ ပွဲပန်းမှုက သေချာပေါက် အရေးပါတဲ့ ကိစ္စတစ်ခု ဖြစ်နေမယ် ဆိုတာပါပဲ”ဟုလည်း ဗန်ဂါးလ်က ပြောကြားသွားသည်။

Credit – soccer myanmar

အောင်မြင့်မြတ်(Myanmar Youths)